NEWS

MV Kigamboni yakwama kivukoni

30/10/2008

Chini ni MV Kigamboni ikiwa imekwama baada ya kuparamia gati kivukoni, na juu pichani, umati wa wasafiri wakigombea kuingia kwenye MV Alina leo (jana) asubuhi upande wa Kigamboni.

HABARI KAMILI:

Mamia ya wakazi waishio maeneo ya Kigamboni jijini Dar es Salaam leo (jana) wamepata adha ya usafiri baada ya kivuko cha MV. Kigamboni kukwama katika eneo la Feri ya kigamboni kuanzia majira ya saa 11.30 (kumi na moja na nusu) alfajiri.

Wakizungumza na waandishi wa habari, baadhi ya wakazi wa eneo hilo wamesema kuwa adha hiyo imetokana na uzembe wa nahodha wa kivuko hicho ambaye ameshindwa kuangalia hali ya bahari ikoje.

“Nahodha anatakiwa kujua tarehe kama hizi na majira kama yale ni kipindi cha maji kupwa hivyo hakutakiwa kuipandisha pantoni juu lakini yeye hakuzingatia hilo akalipandisha juu na kuchelewesha kulitoa na matokeo yake ndio haya tunayoyaona”, alilalamika Feisal Ally ambaye ni mvuvi.

Wavuvi hao pia walishauri ni muhimu kwa manahodha wa vyombo vya majini waelewe na kuzingatia majira ya bahari hii itawasaidia kuepukana na matatizo mbalimbali kama ya kushindwa kuendesha vyombo vyao.

Kuzama kwa kivuko hicho kumesababisha msongamano mkubwa wa watu waliokuwa wanaelekea maeneo ya mjini na Kigamboni hivyo wale waliokuwa na fedha za kutosha pamoja na ujasiri waliweza kupanda mitumbwi kwa kulipa nauli ya Tshs. 500 hadi Tshs. 1000.

Naye Mohamed Abdulla mkazi wa Kigamboni alieleza kwa masikitiko makubwa kuwa amelazimika kutoa Tshs. 2000 kukodisha mtumbwi ili aweze kuvuka ng’ambo ya pili na kuwahi katika kongamano la haki za binadamu linaloendelea huko Ubungo Plaza”.

Baadhi ya madereva wa magari yaliyokuwemo ndani ya pantoni hiyo walisema kuwa baada ya pantoni kuwashwa ilishindwa kuondoka baada ya hapo ilikuja TUG ya mamlaka ya bandari na kuivuta mara tatu kitu ambacho hakikusaidia kwani mara zote tatu kamba ilikatika.

Baada ya pantoni hiyo kushindwa kuondoka watu waliokuwepo ndani walianza kushuka kwa haraka kwa kuhofia kuzama hali iliyopelekea baadhi ya watu kukanyagana na kuumizana. Kutokana na hali hiyo Aneth Kasongo alianguka na kukanyagwa maeneo mbalimbali ya mwili wake na hivyo kuumia mguu wa kulia.

Ndani ya Pantoni hiyo kulikuwa na magari 16 ambapo hadi waandishi wa habari hizi wanaondoka eneo la tukio magari 14 yalikuwa hayajatolewa na madereva wake walikuwa wanasubiri maji yajae ili pantoni iweze kutoka na kuyatoa magari yao.

Hata hivyo msongamano huo wa watu ulipungua baada ya kivuko kidogo cha M.V Alina kufanya kazi kwa haraka ya kuvusha abiria tu kwani huku askari wa Jeshi la wananchi na Polisi wakiendelea kuimarisha hali ya usalama katika eneo hilo.

Akizungumzia tukio hilo Mtendaji mkuu wa vivuko nchini, Frednand Mishama, alisema kuwa ofisi yake inasikitishwa na hali hiyo iliyojitokeza na pia kupongeza juhudi zilizochukuliwa mpaka sasa za kujaribu kuweka hali sawa.

Mishama aliendelea kusema kuwa taarifa rasmi juu ya tukio hilo itatolewa ndani ya siku tatu kuanzia leo (jana) kuelezea chanzo cha tatizo hilo baada ya kufanya uchunguzi wa kina. Kuhusu kukitoa kivuko hicho amesema wanasubiri bahari ijae ili waweze kuitoa.

Tatizo la kukwama kwa kivuko hicho limekuwa la muda mrefu na kuwa kero kwa wakazi wa Kigamboni, hivyo basi kutokana na hali hiyo wameiomba serikali ikamilishe kivuko kipya haraka iwezekanavyo ili lisije lisije likatokea janga kubwa zaidi ya haya yanayotokea hivi sasa.

Kutokana na maelezo yaliyotolewa na wavuvi pamoja na wenyeji wa Kigamboni wanadai kuwa kwa tarehe za hivi karibuni maji yanakupwa kuanzia majira ya saa kumi na moja na nusu alfajiri na kujaa kuanzia majira ya saa sita mchana hivyo basi baada ya maji kujaa pantoni inaweza kutoka na kuendelea kufanya kazi kama kawaida.

Custom Search

Go up