NEWS

Benki ya Exim China yaipa Tanzania msaada wa milioni 170 za Marekani

15/04/2010

Waziri wa fedha na uchumi Mustafa mkulo kulia akibadilishana hati na makamu wa rais wa benki ya Exim ya China Zhu Hongjie ikiwa ni makubaliano ya mkopo wa dola milioni 170 za marekani kwa ajili ya uendelezaji wa mkongo wa mawasiliano wa taifa na uendelezaji wa uwanja wa ndege wa kimataifa wa Zanzibar.

Benki ya Exim ya China imetiliana saini na Serikali ya Tanzania makubaliano ya mkopo kwa ajili kusaidia miradi miwili ya maendeleo nchini Tanzania. Makubaliano hayo yalifikiwa jijini Dar es salam kati ya Waziri wa Fedha na Uchumi, Mustafa Mkulo na Makamu wa Rais wa Benki ya Exim, Zhu Hongjie. Katika mradi wa kwanza Benki hiyo imetoa jumla ya Dola za Kimarekani milioni 100 kwa ajili ya ujenzi wa Mkonga wa Taifa wa mawasiliano awamu ya pili (broadband).

Kwa mujibu wa Waziri wa fedha na Uchumi, Mustafa Mkulo, mkopo huo utasaidia kuimarisha mawasiliano ya Teknolojia (ICT) ikiwemo uboreshaji wa huduma za tovuti na simu. Alisema kuwa msaada huo utasaidia kuchochea maendeleo katika sekta mbalimbali kupitia teknolojia ya mawasilano (ICT) na hivyo kuondoa umaskini. Aidha, Mkulo alisema kuwa pia EXIM Benki ya China itatoa Dola milioni 70 kwa ajili ya kuboresha Uwanja wa Ndege wa Kimataifa wa Zanzibar.

Alisema kuwa hatua hiyo itarahisisha usafiri na usafirishaji wa abiria na mizigo. Mkulo alisema mara baada ya kukamilika kwa uboreshaji wa uwanja huo wakazi na wananchi wa Zanzibar hawana haja ya kuja Dar es Salaam kwa ajili ya shughuli za usafiri badala yake watatumia uwanja huo. Katika hatua nyingine, Waziri Mkulo ametoa wito kwa wananchi wa China kuja kuhudhuria Mkutano wa Dunia wa Biashara utakaofanyika mapema nchini ili kuja kutafuta fursa za uwekezaji. Alisema mkutano huo unatarajia kujumuisha zaidi ya watu maarufu 800 kutoka sehemu mbalimbali duniani.

Custom Search

Go up